Parafr.az

Bakı Dövlət Universitetinin Uzaq Şərq dilləri və ədəbiyyatı kafedrasının müəllimi, siyasi elmlər üzrə fəlsəfə doktoru Katana Qafarovanın “Çin – mənim arzum” kitabının təqdimatı keçirilib.

Təqdimat mərasimində çıxış edən “Parafraz Nəşrləri”nin təsisçisi, yazıçı, tərcüməçi və bədii redaktor Cavid Qədir, kitabın müəllifi Katana Qafarova, kitabın ərsəyə gəlməsi, əsərin ideyası və əsas mesajları barədə fikirlərini bölüşüb, xaricdə təhsil almaq istəyən gənclər üçün əhəmiyyətinə, şəxsi təcrübənin bölüşülməsinin, düzgün istiqamət verən tövsiyələrin vacibliyinə diqqət çəkiblər.

Tədbirdə Çinin Azərbaycandakı səfirliyinin müşavir-elçisi Dinq Tao, Azərbaycan Dillər Universitetinin nəzdində fəaliyyət göstərən Konfutsi İnstitutunun Azərbaycan tərəfdən direktoru, professor Rafiq Abbasov, institutun Çin tərəfdən direktoru Li Yihua, nəşriyyat sahəsində fəaliyyət göstərən mütəxəssislər, oxucular və ictimaiyyət nümayəndələri iştirak ediblər.

“Parafraz Nəşrləri” tərəfindən çapa hazırlanan kitab təkcə bir tələbənin xaricdə təhsil almaq təcrübəsindən deyil, arzuların məqsədə, məqsədlərin isə gerçəkliyə çevrilməsi yolundan bəhs edir. Əsərdə müəllifin şəxsi təcrübəsi əsasında əldə olunan uğurlar, bu uğurların arxasında dayanan uzun hazırlıq mərhələləri, tərəddüdlər, məsuliyyət hissi və şəxsi inkişaf prosesi işıqlandırılır.

Kitabda Çin dili və mədəniyyəti, Pekində tələbə həyatı, magistratura və doktorantura təhsili, beynəlxalq akademik mühit, eləcə də xaricdə təhsil almaq istəyən gənclər üçün praktiki tövsiyələr yer alır. Əsər həm Çinə və xaricdə təhsilə maraq göstərənlər, həm də böyük arzular quraraq qarşıya qoyduqları məqsədlərə çatmağa çalışan oxucular üçün nəzərdə tutulub.

“Çin – mənim arzum” kitabının əsas mesajı ondan ibarətdir ki, insanın həyatını dəyişən təkcə arzuları deyil, həmin arzuları gerçəyə çevirmək üçün atdığı kiçik, lakin ardıcıl addımlardır.

“Parafraz Nəşrləri” adlı yeni nəşriyyat fəaliyyətə başlayıb. 

Nəşriyyatın təsisçi direktoru bədii redaktor, yazıçı, jurnalist və təlimçi Cavid Qədirdir. Direktor açıqlamasında qeyd edib ki, kitabçılıq sahəsinə töhfə vermək üçün yaradılan “Parafraz Nəşrləri” əsasən bədii və elmi-kütləvi əsərlərin çapı ilə məşğul olacaq: 

“Parafraz Nəşrləri” 2018-ci ildən fəaliyyət göstərsə də, rəsmi şəkildə 2025-ci ildə qeydiyyatdan keçib. Nəşriyyat oxuculara təqdim olunan hər kitabda keyfiyyətli məzmunun etibarlılığına, dil-üslub dəqiqliyinə, eləcə də redaktə və korrektə mədəniyyətinə xüsusi önəm verir. “Parafraz Nəşrləri” müəllif, tərcüməçi və redaktor əməkdaşlığını nəşr prosesinin dayağı hesab edir və kitabın ideyadan hazır nəşrə qədər bütün mərhələlərini sistemli şəkildə həyata keçirir”. 

Naşir deyib ki, “Parafraz Nəşrləri” yerli müəlliflərin tanıdılması ilə yanaşı, dünya ədəbiyyatının seçilmiş nümunələrinin Azərbaycan dilinə keyfiyyətli şəkildə qazandırılmasını qarşısına məqsəd qoyur: 

“Nəşriyyatın fəaliyyətində ədəbi zövqün formalaşdırılması, oxu mədəniyyətinin təşviqi və intellektual mühitin zənginləşdirilməsi əsas istiqamətlərdəndir. “Parafraz Nəşrləri” ədəbi layihələr, tərcümə proqramları və maarifləndirici təşəbbüslər vasitəsilə Azərbaycan kitabçılıq mühitində mövqeyini daha da möhkəmləndirməyi hədəf seçib”. 

Nəşriyyatın sloqanının “Sözlərin sirrini aç!” olduğunu deyən Cavid Qədir bildirib ki, “Parafraz Nəşrləri” yenilənmiş konsepsiya, seçilmiş müəlliflər və diqqətlə hazırlanmış nəşrlərlə ədəbi mühitdə öz sözünü deməyi qarşısına məqsəd qoyub: “Bu yolda klassik və müasir ədəbiyyat nümunələri, eləcə də düşüncə və mədəniyyətə töhfə verən layihələr oxuculara təqdim olunacaq. Uşaq kitablarının toplandığı “Naringi Nəşrləri” isə “Parafraz Nəşrləri”nin alt markası kimi fəaliyyət göstərəcək. Yaxın gələcəkdə də müstəqil nəşriyyata çevriləcək”.

Azərbaycan tarixşünaslığının görkəmli nümayəndəsi, məşhur tarixçi alim, professor Mahmud İsmayılovun zəngin ədəbi irsi “Parafraz Nəşrləri” tərəfindən yenidən nəşr olunacaq. 

“Azərbaycan tarixi” dərsliyinin əsas müəlliflərindən və redaktorlarından olan Mahmud İsmayılov elmi fəaliyyəti ilə yanaşı, tarixi romanları ilə də Azərbaycan ədəbiyyatında özünəməxsus iz qoyub. 

Alimin “Ağ yapıncı”, “İki od arasında”, “Qara Yusif”, “Uzun Həsən”, “Xaqani” kimi əsərləri Azərbaycan tarixinin müxtəlif dövrlərini, mühüm tarixi şəxsiyyətləri və xalqın keçmişini bədii şəkildə əks etdirir. 

Müəllifin ən tanınmış əsərlərindən biri olan “Ağ yapıncı” XVIII əsrin 30–40-cı illərində Şəki bölgəsində baş verən hadisələrdən, xalq hərəkatından və Nadir şahın Şəkiyə yürüşündən bəhs edir. “İki od arasında” romanında Əmir Teymur dövrü və Şirvanşahlar dövlətinin tarixində baş verən hadisələr, “Qara Yusif” və “Uzun Həsən” əsərlərində isə Azərbaycan tarixinin mühüm siyasi xadimlərinin həyat və fəaliyyəti bədii müstəvidə təqdim olunur. “Xaqani” romanı böyük Azərbaycan şairinin yaşadığı dövrə həsr edilib. 

Mahmud İsmayılovun bütün əsərlərinin “Parafraz Nəşrləri” tərəfindən nəşri onun elmi və ədəbi irsinin yeni nəsil oxuculara çatdırılması baxımından mühüm layihə olacaq. 

Nəşrlərin vahid konsepsiya əsasında hazırlanması və oxuculara təqdim edilməsi nəzərdə tutulur.